D’Ardennenoffensiv

D’Ardennenoffensiv huet de 16. Dezember 1944 onerwaart mat engem däitschen Ugrëff op déi lëtzebuergesch & belsch Ardennen ugefaangen. Trotz Rumeuren hunn déi, zu Lëtzebuerg stationéiert, amerikanesch Truppen net méi mat enger däitscher Offensiv gerechent. Den Hitler hat den utopesche Plang den Hafe vun Antwerpen anzehuelen an déi Alliéiert zu engem Friddensofschloss ze zwéngen. Déi onvirbereeten amerikanesch Truppe goufen iwwerrannt; zousätzlech huet den décken Niwwel déi alliéiert Loftwaff um Buedem gehalen. Den 22. Dezember huet de Generol George S. Patton e massive Géigenugrëff gestart. Mat vollem Asaz ass hien an den däitschen Ugrëffskäil agedrongen. Et ass zu enger vun de bluddegste Schluechte vum 2. Weltkrich komm: 12.652 däitsch Zaldoten, 10.733 amerikanesch Zaldoten, 500 Ziviliste vu Lëtzebuerg sinn ëm d’Liewe komm a vill Éisleker Dierfer ware komplett zerstéiert. Réischt Enn Januar 1945 goufen déi däitsch Truppen op hir Ausgangspositiounen zréckgedréckt. Déi héich däitsch Verloschter un Zaldoten, Material a Petrol hunn den Zesummebroch vum Drëtte Räich acceleréiert. Mat der däitscher Kapitulatioun den 8. Mee 1945 war den Zweete Weltkrich an Europa eriwwer.